“І тут бы зьвярнуўся да ўсіх беларусаў: глядзіце і слухайце сваё”

«Ідэя нарадзілася падчас размовы з сябрамі ў чаціку. Мы абмяркоўвалі нейкія ролікі на YouTube, і прыйшлі да кропкі, калі нехта сказаў, што беларускіх відэа мала. Я, як чалавек, які заўжды імкнецца шукаць беларускі кантэнт, з гэтым не пагадзіўся. Каналаў, створаных беларусамі, даволі шмат. Але праз асаблівасьці альгарытмаў YouTube яны не заўсёды трапляюць да мэтавай аўдыторыі. YouTube заўсёды будзе прасоўваць тое, што цікава як можна больш шырокаму колу гледачоў.

Таму ў беларусаў у стужках больш расейскіх, украінскіх ці польскіх каналаў, чым беларускіх. Я адразу ў той дыскусіі накідаў некалькі каналаў па тэме, але задумаўся, што было бы зручна, каб беларускія каналы былі сабраныя разам, каб кожны жадаючы мог адкрыць каталёг, знайсьці цікавыя яму каналы і падпісацца" - распавядае стваральнік.

«З прычыны таго, што яго [часу] вельмі мала, бо ёсьць праца і маленькая дачка, то працэс зацягнуўся больш чым на год. І калі сэрвэрная частка ўжо даўно працавала і зьбірала інфармацыю пра каналы і відэа, то фронтэндам я змог заняцца толькі нядаўна. Таму некаторыя функцыі, якія ўжо па сутнасьці гатовыя, як напрыклад, фільтр па мове відэа, я яшчэ на сайце не зрабіў. Але пастараюся выправіць сытуацыю ў бліжэйшы час».

«Пасьля мадэрацыі каналаў (пакуль я гэта раблю ўручную), відэа з каналаў аўтаматычны дадаюцца ў стужку ў рэальным часе. Статыстка па іх абнаўляецца пэрыядычна ў залежнасьці ад даты публікацыі. Тэхнічны бок працы сайту ўвогуле вельмі цікавы і месцамі складаны, бо выкарыстоўваецца шэраг розных сэрвісаў. Пра гэта я магу шмат распавядаць, але гэта будзе цікава толькі адмыслоўцам» — дзеліцца Вячаслаў.

«Нейкіх глябальных плянаў няма. Пакуль проста хочацца дарабіць найбольш запатрабаваны функцыянал. У мяне няма ілюзій, што Brama стане папулярным сайтам. Але, спадзяюся, для тых, хто шукае нешта новае беларускае, ён дапаможа.

І тут бы зьвярнуўся да ўсіх беларусаў: глядзіце і слухайце сваё. Беларускага кантэнта шмат, але яму не хапае ўвагі. Праз гэта аўтары губляюць імпэт, ня могуць паляпшаць якасьць, а ў выніку ўвогуле вельмі часта закрываюць свае праекты.

Падтрымаць Brama можна данатамі. На сайце ёсьць адмысловая старонка пра тое, як гэта зрабіць. І я ўдзячны ўсім, хто ўжо дапамог!" - дзеліцца напрыканцы стваральнік праекта.